Monday, June 19, 2017

සිද්ධාර්ථ කුමරා කොට්ට උරයක



ඉන්දියාවේ සිටි කාලය තුල මයිසූර් සහ බැංගලෝර් පලාත්වල සිදුකළ චාරිකා  අතිශය සුන්දර  විය. හයිද්‍රාබාද් සිට බැන්ගලෝර්වලට වැඩි වියදමකින් තොරව ඩොමැස්ටික් ප්ලයිට් එකක යාමට පුලුවන්කම තිබුනද සංවිධායකවරුන් විසින් අපට අලුත් අත්දැකීමක් ලබාදෙනු රිසියෙන් මේ ගමන පැය 12 ක දුම්රිය චාරිකාවක් ඇතුලත්වන සේ සංවිධානය කර තිබුණි.

හයිද්‍රාබාද් අවට දුම්රිය ස්ථානයකින් සවස 6.30 පමණ දුම්රියට ගොඩවූ අපට බැන්ගලෝර් වෙත ලඟාවීමට හැකිවූයේ පසුවදා උදේ 6.30 ට පමණය. එය වායු සමනය කරන ලද දුම්රියකි. කෑම බීම අවශ්‍ය අයට සැපයුනු අතර වෙලෙන්දෝද බුරියානි, තේ (චායි), පළතුරු, සිසිල්බීම වැනි දේ අළෙවි කරමින් එහා මෙහා ගියහ. දුම්රියේ නිදාගැනීමට පහසුකම් තිබුණද මම නම් බැන්ගලෝර් ගිය ගමනේදී පැයක්වත් නිදාගත්තේ නැත. මේ ගැස්සෙන පැද්දෙන දුම්රිය ඇඳේ මොන නින්දක්ද?.

මා අසළ අසුනේ වාඩිවී සිටියේ සුන්දර ඉන්දියානු යුවතියන් දෙදෙනෙක් සහ ඔවුන්ගේ පියාය. ටික වේලාවක් සුහදව කථාකරමින් සිටි පියා ඔවුන්ගේ ඥාතීන් වෙනත් දුම්රිය මැදිරියක සිටින බව පවසා ඔවුන් බැලීමට ගියේය. මල් මල්ලී ඉන්පසු මේ සුන්දර යුවතියන් දෙදෙනාගේ සමාගමයට නතුවිය. රෑපයෙන් පමණක් නොව කථා බහෙන් පවා ඉතා ප්‍රිය මනාප වූ මේ සුන්දර යුවතියන් දෙදෙනා මල් මල්ලීගේ පාලුව සෑහෙන වේලාවකට මගහැරීය. ආගිය තොරතුරු වලින් ආරම්භ වූ සංවාදය අනතුරුව පුද්ගලික තොරතුරු දක්වාද, ඉනික්බිති කෑම බීම හුවමාරුව දක්වාද, ඡායාරෑප ගැනීම දක්වාද ඇදී ගියේය. අපේ කණ්ඩායමේ අනෙක් උන් සරදම් කරමින්ද ඉඟි බිඟි පාමින්ද එතනින් එහා මෙහා ගියද අපි තිදෙනාගේ සතුටු සාමීචියට එය බාධාවක් නොවීය. අවසානයේ වැඩිමහල් යුවතිය මල් මල්ලීට පොඩි පහේ චරිත සහතිකයක්ද දුන්නේය. එනම් “ යූ විල් බී ස්වීට් හස්බන්ඩ් ෆො යුවර් වයිෆ්“ කියාය. (දැන් අහන්ඩ එපා මක්කද එහෙම කිව්වේ කියලා)



අපේ උන්ටික සුපුරුදු පරිදි මල ගෙවල් වල තනි රැකීමේ පුරුද්ද පෙරට ගෙන කාඩ් සෙල්ලම් කරමින් උන්හ. අන්තිමට අපේ උන්ට කාඩ් සෙල්ලම් කිරීමට නොහැකිවූයේ පිටරට එව්වෝ කාඩ් කුට්ටමට වහවැටුනු නිසාවෙනි. කෙසේ නමුත් දුම්රිය ගාඩ් අය්යා කෙනෙක් පැමිණ දැන් නිදාගතයුතුයැයි දැන්වීය. රාත්‍රී 10 ට පමණ දුම්රිය මැදිරි ඇතුළත ලයිට් ඕෆ් කළ අතර ඉන්පසු සමහර ඉන්දියානු මගීන් නම් ගොරවමින් නිදා ගනු දැකිය හැකිවිය.  අපේ දුම්රිය මගීන් මෙන් “හච පච“ ගෑම්වලින් තොරව මනා විනයකින් යුක්තව මෙම නගරාන්තර දුම්රිය මගීන් ගමන් කිරීම පැසසුම් සහගතය. දුම්රිය ස්ථානයන්හි දුම්රිය නැවැත්වූ විගස නාටාමිවරුන් පොදිකන්නේ මගීන්ගේ බඩු ඔසවාගෙන යාමටය.  ඒ සියලු දෙනාට නිල ඇඳුමක් තිබුණි.


(දුම්රියේ ඇඳන්)
දුම්රියෙන් බසිනාවිට අපට හිමි බස්රථ පැමිණ තිබුණි. අතරමගදී උදෑසන ආහාරය සඳහා පමණක් බස් රථය නැවැත්වූ අතර මැක් ඩොනල්ඩ් අවන්හලක් සහ ඉන්දියානු අවහන්හලක් එහිවිය. පැය 4 ක පමණ ගමනකින් පසුව  11.30 පමණ වනවිට මයිසූර්වල පිහිටි හොටෙල් සිද්ධාර්ථ වෙත ලඟාවීමට හැකිවිය. හොටෙල් සිද්ධාර්ථ හි වයිෆයි පහසුකම් හැර අන් සියල්ල හොඳය. මෙහි කෑම බීම සියල්ල වෙජිටේරියන්ය. සිද්ධාර්ථ හෝටලයේ පිහිටි රෙස්ටුරන්ට් එකේ කෑමබීම සඳහා ඉහල ඉල්ලුමක් පැවතියේ සාධාරණ මිලත්, රසවත් බවත් නිසාය.


මේ හෝටලය ගැන තවත් යමක් සඳහන් කලයුතුය. මෙම හෝටලයේ ලාංඡනය වන්නේ සිද්ධාර්ථ කුමරාගේ රෑපයයි. තවත් සමහරු එය බුදුන්වහන්සේගේ රූපය යැයි අනුමාන කලහ. හෝටලයෙන් ලබාදෙන, ඇඳ ඇතිරිලිවලද, තුවායේද, කොට්ට උරයේද, සබන් කෑල්ලේද, ෂැම්පූ බෝතලයේද සඳහන්ව ඇත්තේ එම රූපයයි. මේ නිසා හෝටලයෙන් ලබාදුන් කොට්ට උර, ඇඳ ඇතිරිලි, තුවා, සබන් ආදිය පාවිච්චි කිරීම සමහර අය ප්‍රතික්ෂේප කලහ. බුදුන් උපන් රටේ සිද්ධාර්ථ කුමාරයාගේ රෑපය මෙසේ සටහන් කර ඇතිවා  මිස පාරේ ඇති බෝ ගසක්වත් පාර පලල් කිරීමට කැපීමට නොදෙන බෞද්ධයින් සිටින අපේ රටේ මෙය සිදුවූවා නම් ඇතිවන තත්වය සිතාගැනීමටවත් අපහසු වනු ඇත.



(කොට්ට උරයක සහ ටවල් එකක දුටු සිද්ධාර්ථ රුව)
උදය වරුවේ ක්ෂේත්‍ර අධ්‍යයන චාරිකාවද පස්වරුවේ කොහේ හෝ තැනකට අපව රැගෙන යාමට තරම් අපේ ආචාර්යභවතුන් කාරුණික වූහ. බැන්ගලෝරයේද, මයිසූර්වලද ආගමික. සංස්කෘතික, විනෝද සහ වැදගත්  ස්ථාන ගනනක් දැකගැනීමට මේ නිසා අපට වාසනාව උදාවිය. මගේ මතකයේ රැඳි වැදගත්ම ස්ථාන වූයේ චාමුන්ඩි කන්දේ පිහිටු දුර්ගා කෝවිල, මයිසූර් මාලිගය, බ්‍රින්ඩාවන් උද්‍යානයයි.

බ්‍රින්ඩාවන් උද්‍යානය එතරම් විශාල උද්‍යානයක් නොවූවත් එහි සුන්දරත්වය සහ රාත්‍රියේ පවත්වන ආලෝක සන්දර්ශනය නිසා සංචාරකයින් අතර ඉතා ජනප්‍රියත්වයට පත්වූ ස්ථානයකි. ක්‍රිෂ්ණරාජා සාගර වේල්ල අසල ඇති මෙම උද්‍යානය පුරාම ඇත්තේ කුඩා පොකුණු, කෘතීම දිය ඇලි, වතුර මල් වැනි ජලයට සම්බන්ධ වූ නිර්මාණයන්ය. සැබවින්ම එම උද්‍යානය මනස්කාන්තය.






දුර්ගා කෝවිල පිහිටා ඇත්තේ මයිසූර් සිට කිලෝ මීටර් 13-14 පමණ දුරින් ඇති චාමුන්ඩි කන්දේය. කන්දේ උස අඩි 1000 ට වැඩිය. චාමුන්ඩි කන්දේ දේවාලය ආශ්‍රිතව පවතින පුරාවෘත්තයකට අනුව අතීතයේ චාමුන්ඩි කන්ද මහීෂන් නම් අසුරයාගේ නිජබිම වී ඇත. මහීෂන් අසුරයා මහීෂන්පුර වැසියන්ට පීඩාකරමින් පාලනය කරනු දැක ශිව දෙවියන් ඔහුගේ බිරිඳවූ පාර්වතියට මහිෂන් අසුරයාගේ තාඩනපීඩනවලින් මහිෂන්පුර ජනතාවට නිදහස ලබාදෙන ලෙස නියම කර ඇත. පාර්වතිය දුර්ගාදේවියගේ රූපය මවාගෙන මහිෂන් අසුරයා හමුවට ගොස් සටන් කර අසුරයා පරවදා මහිෂන්පුර වැසියන්ට නිදහස ලබාදුන්නේය. මෙම දුර්ගා දේවී කෝවිලට පැමිණෙන බැතිමත්හු  මහිෂන් අසුරයා පැරදවූ දුර්ගා දේවිය සිහිකොට  පුදපූජා පවත්වති.


අපේ රටේ නුවරඑලියේ පවතින දේශගුණය මෙම පෙදෙසේ දැකිය හැකිය. මෙම දේවාලය නැරඹීමට ගිය විට මේ කොහේදැයි නොදත් සුමෝ නංගී “ෂා මෙහාට මාර හුලඟක්කේ තියෙන්නේ ෂුවර් එකටම මේ කිට්ටුව බීච් එකක් ඇති“ යැයි  පැවසීය. දේවාලයට යන මග දෙපස පුජා භාණ්ඩ, විසිතුරු භාණ්ඩ, ඇඳුම් පැලඳුම්, සෙල්ලම් බඩු, ආහාරපාන විකිණීමට ඇති වෙළඳසැල් විශාල ප්‍රමාණයක් ඇත. අපිද මෙහි තිබූ කුඩා කඩයකින් උණු වඩේද, සුමෝගේ දැඩි ඉල්ලීමකට අනුව මාලු මිරිස් බැදපුවාද කා තේ (චායි) බිව්වෙමු.

මයිසූර් යන කෙනෙකු විසින් නැරඹිය යුතුම අනෙක් ස්ථානය නම් මයිසූර් මාලිගයයි. මෙය දකුණු ඉන්දීය මහාරාජාවරුන්ට සෙවනදුන් අතිසුන්දර මාලිගයකි. මයිසූර් මාලිගයේ වාසය කර ඇති අවසන් මහා රාජා වන්නේ “මහාරාජා ක්‍රිෂ්ණ රාජා වඩිවේල්ය“ .

මයිසූර් මාලිගය නැරඹීමට යාමේදී මතක  තබාගතයුතු කරුණු කිහිපයකි. පළමුව මාලිගයට ඇතුල්වනවිට පාවහන් ගලවා ඇතුල්විය යුතුය. මාලිගය ඇතුලත ඡායාරූපගැනීම, වීඩියෝකිරීම සපුරා තහනම්ය. මාලිගය තුළ ඇති රන්, රිදී භාන්ඩ සහ පෞරාණික භාණ්ඩවල ආරක්ෂාවට මෙම පියවර ගෙන ඇත. මාලිගයෙන් පිටත ඡායාරෑපගැනීම වීඩියෝ කිරීම ගැටලුවක් නැත. මාලිගයට ඇතුල්වීමට ගේට්ටු 5 කි. මාලිගය සම්පුර්ණයෙන් නැරඹීමට පැය හතරක් පමණ කාලයක් ගතවේ.

මාලිගය ඇතුළත දර්ශනීය කිරිගරුඬ නිර්මාණ, පිඟන් ගඩොල්, බුමුතුරුණු, වීදුරු නිර්මාණ, ලී කැටයම්, පෞරාණික චිත්‍ර, වීදුරු පහන්, මහාරාජාවරුන් පරිහරණය කළ බඩු භාණ්ඩ යනාදිය දැකගතහැකිය. සමහරවිට මහාරාජාවරුන්ගේ සහ පවුල්වල අයගේ චිත්‍රද දැකිය හැකිය. මයිසූර් මාලිගාවේ සුන්දරම දර්ශනය නම් ලයිට් ෂෝ හෙවත් ආලෝක සන්දර්ශනයයි. ඒ මුලු මාලිගාවම ආවරණයවන පරිදි තබා ඇති විදිලි බුලුලුවලින් මුලුමහත් මාලිගාවම ඒකලෝකවන මොහොතයි. එවිට මයිසූර් පැලස් දිස්වන්නේ සුරපුරයක් ලෙසිනි. ඇත්තේන්ම ඔබ මයිසූර් යනවා නම් මයිසූර් මාලිගය දැකගතයුතුම ස්ථානයකි.




හයිද්‍රාබාද් ආසන්නයේ පිහිටි හුසේන් සාගර් ද අප සංචාරය කළ ස්ථානයකි. වැවක් මැද පිහිටි බුදු පිලිමයක් ඉදිකර තිබූ මෙයට යා යුත්තේ බෝට්ටුවකිනි.


මෙම ස්ථානයන්ට අමතරව සත්ව උද්‍යාන, පන්සල්, පල්ලි, කාර්මික ජනපද, සුලු කර්මාන්ත පිහිටි ගම්මාන, කර්මාන්තශාලා, ආදර්ශ ගොවිපල ඇතුලු ආයතන විශාල ප්‍රමාණයක සංචාරය කිරීමට අපට හැකිවූයේ අපේ ආචාර්යභවතුන්ගේ කාරුණිකත්වය නිසාය. 











Sunday, May 14, 2017

ඉබ්බා තුනපහ පිටේ බැඳගෙන කාමරයට ආවත් කන්න පින නැතිකම



මෙවැනි විදෙස් සංචාර ගියවිට තාවකාලික පෙම් සබඳතා ඇතිවීම සාමාන්‍ය දෙයක් බව මට වැටහුනේ මෙහිදීය. දිගු කලක් වෙනස් පරිසරයක නිවසින් හා සමීපතමයන්ගෙන් ඈත්වී ඉන්නට සිදුවීමත්, ඒ නිසා ඇතිවන නිදහසත්, පිටරටකදී මොන මගුල ඩාන්ස් කලත් තමන්ගේ රටේ අයට චාටර් නොවීමත්මෙයට හේතුභූත වියහැකිය.එසේම ලව් සහ ලයික් අතර වෙනස පිළිබඳව දැනුමක් ලැබුනේද මෙහිදීය. මෙවැනි එක් සබඳතාවයක් පවත්වන කෙල්ලකගෙන් වරක් මා ඇසුවේ “යූ ලව් හිම්?“ ඇය එකවරම කිව්වේ “නෝ නෝ අයි ලයික් හිම්“ කියාය. ඒ යුවල හැසිරුනේ පෙම්වතුන් යුවලක් මෙනි. අපිට ලව් කෙරුවාවක් වූ මේ ලයික් කෙරුවාව මෙහි සිටි කාලය තුළ සෑහෙන දුරකට දකින්නට අපට හැකිවිය. ලව් කෙරුවාව බොහෝ විට එක් අයෙකුට සීමාවූවවත් ලයික් කෙරුවාව කිහිප දෙනෙකු හා සම්බන්ධ වේ. සමහරවිට උදේ එක ලයික් එකක්ද සවස තව ලයික් එකක්ද වැටෙනු දැකගැනීමට හැකිවූයේය.

Tuesday, May 2, 2017

සමණල රංචුද, තනි සමණලයින්ද පාරේදී හමුවීම



ඉන්දියාවට ගිය මුල් දින කිහිපය තුළ කට්ටිය ෆුල් පිලිවෙලට හිටියත් ටික දවසක් යද්දී බලල්ලු එකා දෙන්නා මල්ලෙන් එලියට පණින්නට පටන්ගත්හ. ඒ තම තමන්ට ආවේනික අංග ලක්ෂණ ප්‍රචලිත කිරීමට යාම නිසාවෙනි. ඒ නිසා ටික දවසකින් කට්ටියගේ චර්යාවන් අනුව නික් නේම් ආදේශ කිරීම ආරම්භ වූයේ  සුමෝ නංගීගේ ප්‍රධානත්වයෙනි. ජේබී = ජින් බතලි, එම් කේ = මනෝ කුකුල්භාවය,  එන් එම් = නුවර මහසෝනා, ටී.ටී. = තල්ලේ තුවාල, පී.ජී. = පින් ගොනා, පී.ඊ. = පස්ස එලියේවැනි ද්විත්ව අකුරැ නාම මේ ආකාරයට සිදුවූ නාමකරණයන්ය. මනෝ කුකුල් භාවය යනු කෙල්ලෙකුට තදින්ම හිතින් ලව් කිරීමය. තල්ලේ තුවාල ඇතිවන්නේ චීස් කෑම නිසාය. පින් ගොනා යනු ස්වාමි පුරුෂයාට කියන ආදර වදනකි. මේවා කට්ටිය ඒ වෙලාවට කිව්වා මිස මෙහෙට ආවාට පසු දිගට ගෙනිච්චේ නැත.

Wednesday, April 19, 2017

සමහරු අත් දැකීම්ද සමහරු කකුල් දැකීම්ද ලැබූ ඉන්දියා ගමන



පහුගිය කාලය පුරාම මා සිටියේ ඉන්දියාවේ බව මීට ඉහත ලියූ පෝස්ට් දෙකකින් කීවෙමි. මේ ඉන්දියා ගමන අත්දැකීම් හැට හුට හමාරක් ජනිත කල ගමනක් වූවායැයි කීම වැරැද්දක් නොවේය. ඒ තරම් අත්දැකීම් සම්භාරයක් ලබාගැනීමට මේ ගමනේදී හැකියාව ලැබුනි. අත්දැකීම්වලට අමතරව ඇත්තෝද හැක්කෝද කකුල් දැකීමට වාසනාවන්ත වූවෝය. ඒත් ඉතින් අපි සංස්කුරුතිය සදාචාරය බෙල්ල දී රකින නිසාත්, ඇල් වතුරත් නිවා බී හතර පෝයට සිල් ගන්නා නිසාත් ඒ වගේ දේවල්වලට නම් ගියේ නැතිය. මේ කියන්නේ අමූලික ඇත්තය. මම බොරු කියනවා කියා හිතෙනවානම් කැමති කෙනෙකුට ඉන්දියාවේ අපිට ඉගැන්වූ ආචාර්ය භවතෙකුගෙන් අපි ගැන චරිත සහතිකයක් වුවත් ලබාගත හැකිය. කොටින්ම මින් මතුවට අපි ඉගෙනුම ලැබූ ආයතනයට ශ්‍රී ලාංකිකයන් පමණක් බඳවා ගත්තද පුදුම විය යුතු නැත. ඒ තරමට ශ්‍රී ලාංකියන් හොඳ බුවාලා බව අපි ඒ අයට ඒත්තු ගැන්වූ නිසාවෙනි.

Tuesday, March 28, 2017

විල් තෙර සුපිපි තඹුරු වන සිරි (නෙලුම් යාය 2016)




සෙණසුරාදා උදෙන්ම දුර බණුව කෑ ගහනවා. දන්නේ අදුනන්නේ නැති නම්බර් එකකින් කෝල් එකක්. සාමාන්‍යයෙන් මම අදුනන්නේ නැති අංකවලට ආන්සර් කරනවා අඩු උනත් මේක ගන්න සිද්ධ උනේ පොඩි එකීම අප්පච්චිට කෝල් එකක් කියලා ගෙනත් දුන්න නිසා. “මේ ඔයාට අද නෙලුම් යායේ සම්මානයක් තියෙනවා. අපි ඔයාව පහුගිය දවස් ටිකේම කන්ටෑක් කරගන්න හැදුවා. බැරි උනා. ඒකයි අද ගත්තේ. අද හවස තුනට වෝටර්ස් එජ් එකේ. “හා හරි හරි මම එන්නම්“ මමත් හදිස්සියෙම කිව්වා. පස්සේ තමයි මට මතක් උනේ යකෝ නම ගමවත් අහගත්තේ නෑ කියලා. පහුගිය දවස්ටිකේම රටින් බැහැරව ඉඳලා ආව විතරයි. එහෙ හිටපු කාලේ දුරකථනයත් වැඩ කලේ ඉඳ හිට. කෝකටත් අද හවසට යනවා.

Sunday, February 12, 2017

ඒක හීනයක් විතරයි

පුංචි දියණියත්, බිරිඳත් සුව නින්දේ. බාගෙට විවර කරලා තිබුනු ජනේලයෙන් සිහිල් සුළං රැල්ලක් කාමරයට ඇදිලා ආවා. හුඟ කාලෙකින් ඇදහැලුනු වර්ෂාවත් එක්ක මෙතෙක් කල් පැවති කර්කෂ රෂ්මිය මැකිලා ගිහින්. යන්තම් සිරිපොද වැස්සක් වැටෙන සිලි සිලි හඬ ඇහෙනවා. සිගරැට්ටුවකුත්  ලයිටරයත් අරන් බැල්කනියට ආවේ මේ සුන්දරත්වය විඳින්න ඕන හුදකලාවත් එක්ක කියන හැඟීමත් එක්ක.

Tuesday, February 7, 2017

රාමෝජි සිනමා නගරය නැරඹීමට ගියෙමි.

මා මේවනවිට ඉන්දියාවට පය ගසා ඇති බව කලින් පෝස්ටුවෙන් කීවෙමි. එද්දී නම් සිතුවේ දේශනවලට සහභාගී හොඳ දරුවෙකු වශයෙන් ගිය වැඩේ හරියට කරගැනීමටය. නමුත් සතියක් ගතවෙද්දී ලෙක්චර් කට් කිරීම පිලිබඳව විශේෂ ප්‍රාගුන්‍යක් හිමිවීම නිසා අපිත් එක්ක ආපු එවුන් හවස්වරුවේ ඉන්නේ කාමරවලය. එසේත් නැතිනම් ලංකාවෙන් පැමිණි  අහිංසක අසරණ ගෑණු දැරිවියන්ට සාරි කඩ, සෙරෙප්පු කඩවලට පාර කියාදීමෙනි. නැත්නම් මෙහෙ ස්ටාෆ් එකේ කවුරුන් හෝ සෙට් කරගෙන ක්‍රිකට් ගසමින්ය. අපේ එවුවන් කවුරුවත් තවම ටෙම්පරි ලව්වලට සෙට් වී නැති නිසා සියලු දෙනාටම සෑහෙන විවේකයක් හිමිවීම හේතුකොටගෙන විෂය කටයුතුවලට වඩා විෂය බාහිර කටයුතුවල නිරතවීමට ඉඩ හසරපෑදී ඇත. නැතිනම් ගොනා සහ කරත්තය සේ යන යන තැන ටෙම්පරි කෑල්ල එල්ලාගෙන යාමට සිදුවනු ඇත.

Thursday, February 2, 2017

අසල්වැසි රටේ සිට ලියමි

හුඟ කාලෙකින් බ්ලොග් එකේ මොකුත් කුරුටු ගාන්නට නොහැකිවීම ගැන බ්ලොග් ලියන, බලන, කොමෙන්ට් කරන, අසන, නරඹන සියලු දෙනා සමාව භජනය කොරන්න ඕනෑය. අවුරුද්ද අන්තිම නිසා ඔෆිසියේ වැඩ වැඩිවීමත් ඊට පස්සේ ලැබුනු ශිෂ්‍යත්ව කෑල්ලක් නිසා ඉන්දියාවට එන්නට සිදුවීමත්, මෙහේ ඇවිත් මුල් කාලේ පොඩි මඤ්ඥං ගතියක් ඇතිවීමත් නිසා මේකේ මොකුත්ම ලියන්නට බැරි උනෝය. දැන් නම් පොඩ්ඩක් විතර සෙට්ල් ගතියක් දැනෙන නිසා මොනවම හරි ලියන්න ඕනෑ කියා සිතුනේ නැතිනම් බ්ලොග් එකටත් කරන අසාධාරණයක් නිසාය.