අපි ඇච්චා බැච්චා
කොල්ලෝ කාලේ උඹ කිරිකට් පිත්තෙන් ලැදර් බෝලේ පලු අරිනවා, විකට් කුඩු කරනවා දැකලා
හුරේ පාර දැම්මත් උඹ ඒ කාලේ සිරි ලංකා ටීම් එකට කෙලිනවා දැක්කාම නම් පොඩ්ඩක් උඹත්
එක්ක මලෙන් හිටපු එක ඇත්තය. ඒ හිතේ තරහකට නෙමේය. ඒ මොනවා උනත් උඹ බෑට් බෝල්
ගැහිල්ල අතෑරලා අලුතෙන් පක්ෂයක් හදාගෙන පලවෙනි ඡන්ද දෙක තුනෙන්ම ඇදගෙන නානකොට මම
හිතුවේ බොටත් පිස්සුය කියලාය. ඒත් බොලා දැන් රටේ අගමැතිවීම ගැන මගේ ඇත්තේ අප්පමාණ
මෙව්වා එකකි. ඒ මොනා උනත් උඹත් කෙලින්න හදන්නේ අපේ පන් ගොයියලා කෙලපු මඥ්ඥන්ම වගේ
පෙණුන නිසා මේ ටික ලියුමකින්ම ලියලා එවන්න හිතුනේ අපේ රටේ යහ පාලන නඩේට වෙලා තියෙන
සන්තෑසියම බොටත් ඊලඟ ඡන්දෙදි වෙයි කියලා හිතෙන නිසාය.
ඉම්රාන් අය්යේ
උඹ හෙන පරාර්ථකාමී පොරක් කියලා අපේ උන් හිතනා කාරනේකින්ම මම මේක පටන් ගන්නම්ය. ආපු
ගමන් උඹට තිබුනු වාහන ටික වෙන්දේසි කොරන්නට උඹ කටයුතු කොරාපු බව මමත් දැක්කේ
පත්තරෙන්ය. උඹ මේ කොරනා ජාතියේ වෘෂභ වැඩක් සැටලයිට් නෝනා ඉස්සරලාම ජනාධිපති වෙච්ච
ගමන් කෙරුව බව මට මතකය. ඒ කලින් රට පාලනය කොරාපු අලි පාටියේ එවුවන් රට කාලා ඇති
තරම පෙන්නනට අලි ඇමතිවරු පාවිච්චි කොරපු සුඛෝපුබෝගී වාහන ටික උන්දෑත් කජු ඇට කොස් ඇට
වටිනාකමට වෙන්දේසි කොලේය. ඒ වාහන ටික වෙන්දේසියේදී ගත්තේ අලි පාටියේ හිටපු මැති
ඇමැත්තන්ගේ දුවලා පුතාලාමය. ටික දවසකින් රටට එන විදේශ අමුත්තෙකුට දෙන්නවත් ආණ්ඩුවේ
පූල් එකේ වාහන නැති නිසා කෝටි ගණනක් දී ආයෙත් තිබුණාටත් වඩා හොඳ එව්වා පිටරටින්
ගෙන්වන්ට සිද්ධ විය. ඒ නිසා මාධ්‍ය සන්දර්ශන තිබ්බත් ටිකක් දුර දිග බලලා කොරපන්ය.
උඹ බොහොම සරළ
පොරක් වෙන්න කැමති බව මාධ්‍යවලට කියා තිබුණා මතකය. ඒ නිසා අගමැති කාර්ය මණ්ඩලය
දෙන්නෙකුට සීමා කොර අගමැති නිල නිවසත් විශ්වවිද්‍යාලයක් කොරන්න යන බව ආරංචි විය.
අපේ රටෙත් ඔය කියලා විදිහේ සරළ ගති පෙන්නාගෙන ආපු ඩබලක් දැන් රටට සෑහෙන ධනයක්
ඉතිරි කොරදී ඇති නිසා පොඩ්ඩක් පරිස්සමින්ය. අපේ එකෙක් වැඩබාර ගත් දවසේ අත්සන් කලේ
බෝල් පොයින්ට් පෑනෙන්ය. කෑවේ මායියා ගෙදරින් කෙහෙල් කොලේ ඔතලා දුන්න බත් එකය. අනිකා
බලය ගත්ත මුල්දවස් ටිකේ මාධ්‍ය කාරයෝ රොත්ත බුරුත්ත පිටින් අරලිය ගහ පැලස් එකට
ගෙන්වා ඒකේ ඇති රත්තරන් කක්කුස්සි, රත්තරන් අශ්වයෝ, රහස් සේප්පු, කෝටි ගණන් සල්ලි,
ලැම්බෝ ගිනි, රත්තරන් කඩු, පොලු, කිනිසි, තෝමර පෙන්නුවෝය.
ඒත් අපායේ ඉන්ටර්වල් ඉවර
නිසා වෙන්න ඇති දැන් උන්ගේ පැලැන්තියේ එව්වෝ වෙඩින් ගන්නෙත් අරලිය පැලස් එකේය.
රත්තරන් අශ්වයෝ පෙන්නාපු එව්වෝ මලපහ කොරන්න පාවිච්චි කොරන්නෙත් ලක්ෂ පනහේ හැටේ
කොමඩ්ය. උන්ගේ ගෝලයින්ට පුක තියන්න ඕනෑ රත්තරනින් හදාපු පුටු වලය. මේ සරළ පොරවල් දැන්
රටට ඇන ගසා, මහ බැංකුවත් කඩා, ආර්ථිකය රිම් එකෙන් යවා ඇත්තේය. ඒ නිසා උඹත් ඕනවට
වඩා සරල වෙන්න ගිහින් පස්සෙන් පහු පශ්චාත් බාගේ ටින් කිරි ආලේප කොරගන්න එපාය.
අනික උඹත්
බලේට එන්නට කලින් කප්පරක් පොරොන්දු දෙන්න ඇතිය. ඔව්වා තව ටික දවසකින් මිනිස්සුන්ට
මතක බැරිවන නිසා ගණන් නොගෙන හිටපන්ය. අපේ රටෙත් නිකන් බයික් දෙනවා, හැමෝටම කාර්
දෙනවා, අතට බ්‍රේස්ලට් දෙනවා, කරට මාල දානවා, සල්ලි වැසි වස්සනවා, කිරියෙන්
පැනියෙන් උතුරවනවා, රට සුරපුරයක් කරනවා කියූ එවුන් දැන් ගෑණුන්ගේ මාසේ මාරුවෙන
දවසට ගහන අමුඩෙටත් කප්පරක් බදු ගසා ඇත්තේය. අපිව හිඟන්නන් කර ඇත්තේය. ඒ නිසා
පොරොන්දු ඇත්තේ ඉෂ්ඨ කොරන්න නෙමේ අමතක කරන්න කියන වාක්‍ය ඔලුවේ තියා ගනින්ය.
උඹ ඕනෑ තරම් පිටරටවලින්
ණය ගනින්ය. හැබැයි රටේ ණය බර වැඩි වෙන්නේ කලින් එවුන් ණය අරන් රට සංවර්ධනය කොරපු
නිසා බව කියන්නට ඕනෑය. බදු ගහන්නේ කලින් උන් ගත්ත ණය ගෙවන්න කියා ඒ බද්දටත් නවාස්
ෂෙරිෆ් බද්ද වගේ නමක් දැම්මට කමක් නැතිය. මෙහෙත් කෙරෙන්නේ එහෙමය. උඹට ඒ ගැන උපදෙස්
ඕනෑනම් අපේ ආර්ථික ඔස්තාර්ලාගෙන් ඒකට උපදෙස් ගන්න පුලුවන්ය.
මේක බොහොම
වැදගත් දෙයක්ය. කිසිම විදිහකින් රටේ මහ ජාතියට නම් සළකන්නම එපාය.
උන් මොනා කෙරුවත් ගොන් වාගේ උඹට ඡන්දෙ දෙනවාය. පුලුවන් තරම් සුලු ජාතීන්ටම
සළකපන්ය. සුලු පක්ෂ වලින් එන ඇමතියන්ට උන්ගේ
එවුන් පදිංචි කරන්නට කැලෑ කපන්නට දී දැක්කා නොදැක්කා ගානට හිටපන්ය. සුලු පක්ෂ වල
එවුන් පුරා විද්‍යා ස්මාරක ඩෝසර් කරනකොට ඒවා දිහා උඹ බලන්නටවත් ඕනෑ නැතිය. අනික
රටේ නීතිය ජාතිය අනුව වෙනස් උනාට කමක් නැතිය. උදාහරණයක් හැටියට කිව්වොත් මෝටර්
බයිසිකයෙන් යද්දි හෙල්මට් දාන්න ඕනා කියලා නීතියක් තිබුනොත් සුලු ජාතිකයින්ට ඒවා
බලපවත්වන්නට ඕනෑ නැතිය.
ත්‍රස්ථවාදීන්ට
මානව හිමිකම් ඇතිබව නම් හොඳින්ම මතක තබා ගනින්ය. උන්ව සමරන්න උත්සව සංවිධානය කොලාට
උඹ කලබල වෙන්න එපාය. මොකද කිව්වොත් ත්‍රස්ථවාදීන් උඹේ රටේ මිනිස්සු, බඩදරු අම්මලා,
කිරි සප්පයෝ, පුජ්‍ය පක්ෂය පෙති ගහලා මරලා දැම්මත් ත්‍රස්තවාදීනුත් උඹේ රටේ දරුවන්ය.
පුලුවන්නම් ඇමතියෙක් දාලා කැබිනට් පේපර් එකක් ඉදිරිපත් කොරලා මැරිච්ච ත්‍රස්තවාදීන්ට
වන්දිත් දීපන්ය. තව උන්ගෙන් සමාවත් ගනින්ය. මිනිස්සු මරලා බෝම්බ පුපුරවලා හිරේ
ඉන්න ත්‍රස්ථවාදින්ටත් සමාව දෙන්න බලපන්ය. මැරිච්ච ත්‍රස්ථවාදීන් වෙනුවෙන් උපහාර උත්සව තියන්නට ආණ්ඩුවේ සල්ලිත්
පාස් කරපන්ය. තව උන්ගේ ප්‍රතිමා හන්දියක්
හන්දියක් ගානේ හදන්නට ඉඩදීපන්ය. ඒවාට විරුද්ධ වෙන එවුන් ජාතිවාදීන්, සන්හිඳියාවට
විරුද්ධ උන් බව කියාපන්ය. මහ ජාතිය ගැන කථා කරන එවුන්ට ජාතිවාදී ලේබල් ගසා මොකක්
හරි බොරු නඩුවකට උන් පටලවා හිරේ දමාපන්ය. තව
යූ.එන් එකට ගිහින් රජයේ හමුදා යුද අපරාධ සිදුකර ඇතැයි කියන්නට නම් උවමනාය. හැබැයි
මොනා කෙරුවත් රට වෙනුවෙන් ජීවිතය පූජා කරපු ආරක්ෂක අංශයේ එවුන්ව නම් මලාට සමරන්න
එපාය. ඒක ජාති ද්‍රෝහි වැඩක් හැටියට සළකා තහනම් කරපන්ය.
ඉම්රාන් අය්යේ
රටකට පාතාලයක් නැත්නම් කිසි ආතල් එකක් නැතිය. පාතාලේ කටයුතු නිදහසේ කොරගෙන යන්නට
අවශය්‍ය යටිතල පහසුකම් සම්පාදනය කොරන්නට ඇමතියන්ගේ සිට ප්‍රාදේශීය සභා මන්තිරිලා
දක්වා අවසර දීපන්ය. ඒ කටයුතු සම්බන්ධීකරණයට නියෝජ්‍ය පොලිස්පතියෙක් පත් කොරපන්ය.
පට්ට ආතල් දෙන
පොලිස්පති කෙනෙක් පත් කොරගන්නට අමක කරන්නට නම් එපාය. රටේ මොන ප්‍රශ්න තිබුණත්
පෙරහැරකට ගියොත් හණුමා වන්නම නටා හෝ පොලිස්පතියා රටේ ප්‍රශ්න අමතක කරවන්න පුලුවන්
ගොබිලෙක් වෙන්ඩ ඕනෑය.
ඡන්ද තියෙන එක
ගැන නම් හිතන්නවත් එපාය. ඡන්දේ කල් දාගන්න ඕනෑතරම් උප්පරවැටි තියෙනවාය. අලුත් ඡන්ද
ක්‍රමයක් හදන්න කාලය ගන්න පුලුවන්ය. ඊට පස්සේ ඔක්කොම ඡන්ද එක දවසක තියන්න ඕනා
කියන්න පුලුවන්ය. ආයෙත් හදාපු එකේ අඩු පාඩු අයින් කොරන්න කියලා තව ටිකක් කල් අදින්න
පුලුවන්ය. ඕන නම් පුරවේසි බලය වගේ නම් ඇති සංවිධාන කිහිපයක් අටවා පොඩි සම්තින්
පාරක් අතට දී උන්ට කියා ඡන්දය කල් දම්මවන්නට නඩු දාන්නටත් පුලුවන්ය.
අනිත් එක රටේ
ප්‍රශ්න අමතක කරවන්න ඕනෑ තරම් ක්‍රම සහ විධි තියෙනවා. උඹේ රටේ ක්‍රිකට් ටීම් එක
මැච් එකක් දිනුවොත් එදා රෑම දොලහට තෙල්
ගෑස් මිල වැඩි කොරපන්ය. රජයේ සේවකයින් පඩි වැඩි කරන්න කිව්වොත් ඒකට කොමිටියක් පත්
කරාම ඇතිය. හැබැයි මතක ඇතිව හැට හුට හමාරක් මන්තිරියලාගේ පඩිය වැඩි කොරපන්ය. උන්ට
සුපිරි වාහනයක් ඉම්පෝට් කරගන්නට පර්මිට් එකක් දීපන්ය.
මිනිස්සුන්ට
කන්න නැති උනා කියලා උඹ පොඩ්ඩක්වත් සැලෙන්න එපා. උන්ට කොස් කොල, පොල් කොල වගේ පෝෂ්‍යදායක
ආහාර කන්නට පුලුවන්ය. නැත්නම් ජපානයට යවනා මුරුන්ගා නම් අති පෝෂණීය ආහාරය උනත් තම්බා
තුන් වේලම උනත් කන්නට බැරි කමක් නැතිය. පිදුරු, පුන්නක්කු කාලා වාගේ වැඩ කරනා
එවුවන්ට කොස් කොල, මුරුන්ගා කොල කෑවා කියා අයහපතක් සිදුවෙන්නේ නැතිය.
රජයේ ආයතනවලට
බිල්ඩින් කුලියට ගද්දී නිලියන්ට අයිති
බිල්ඩින් වලට විශේෂත්වයක් දක්වන්නට චක්‍රෙල්ඛයක් නිකුත් කොරපන්ය. කුලියට ගත්තත්
ඒකේ පදිංචියට යන්නට අවුරුදු දෙකක් තුනක් ගියාට කමක් නැතිය.
තව කියන්නට
වටිනා කියන දෙයක් තිබෙනවාය. රටේ නීතිය හරියට ක්‍රියාත්මක කොරපන්ය. පොල් ගෙඩියක්,
කොස් ගෙඩියක් තමුන්ගේ දරුවන්ගේ බඩගින්න නිවන්නට හොරකම් කරපු එකාටවත් සමාවක් දෙන්න
එපාය. මහ බැංකුව කඩනවා වාගේ හොරකම් සිදු උනොත් ඒවායේ පරීක්ෂණ වාර්තා අවුරුදු ගානකට
එලියට ගන්නට බැරිවෙන්න ලේඛනාරක්ෂක දෙපාර්තමේන්තුවට යවපන්ය. නැත්නම් රටේ අනිත්
එවුනුත් බැංකු හොරකම් ඉගෙන ගන්න පුලුවන්ය. නැත්නම් නීතිපතිට යවපන්ය. නීතිපති
අවුරුදු දහයක් අරන් හරි ඒකට උත්තර එවනවාය. නීතිය නම් කාටත් එකය. නීති කඩන්න දෙන්න එපාය.
නැවෙනා නීති ගැන නම් ඉතින් කරන්නට දෙයක් නැතිය.
මහ බැංකුව වගේ
ආයතනවල අධිපතිකමට විදේශ පුරවැසිභාවය තියෙන
එකෙක්ම දාගන්නට අමතක කොරන්න එපාය. ඒකා බැඳුම්කර වෙන්දේසිය ගැන විශේෂඤයෙක් වීම
වඩාත් වාසි සහගතය. වඩාත්ම වැදගත් වන්නේ මහ බැංකුවට පත්කරන එකාගේ පුතෙක් එහෙමත් නැත්නම් අඩුම තරමේ බෑනෙක්
බැඳුම්කර බිස්නස් එකට සමාගමක් පිහිටුවාගෙන තිබීමය.
රස්සා දෙනකොට
නම් උසද මිටිද කියා බලපන්ය. උස එවුන්ව සෙකියුරිටි රස්සාවටද මිටි එවුවන් කම්කරු
රස්සාවටද දාපන්ය. ඒවා දැන් ජාත්‍යන්තරව රැකියා දෙන්නට පිලිපදින ප්‍රමිතීන්ය.
ඔය රටේ තියෙන
යල්පැන ගිය නීති රීති එහෙම වෙනස් කොරපන්ය. විශේෂයෙන් ආගමික උත්සව දවස්වලට බාර්
අනිවා ඇරලා තියන්නට උවමනාය. ඒ වගේම ගෑනුන්ට අරක්කු බාර්වලින් ගන්න බෑ වගේ රටේ
දියුණුවට තදින්ම බාධාවෙන නීති අයින් කරලාම දාපන්ය. ඒත් එක්කම කියන්න ඕනේ මොකක් හරි
ලස්සන නමක් දාලා සමලිංගික අධ්‍යාපනය වගේ දේවල් දරුවන්ට පාසැල් කාලයේ ඉඳලාම කියලා
දෙන්න ක්‍රමයක් හදාපන්ය. නැත්නම් රටවල් දියුණු වෙන්නේ නැතිය.
තෙල් මිල සූත්‍රයක්
මොනවා හරි ඉංජිරිස් අකුරු ටිකක් දාලා හදාගනින්ය. හැබැයි ඒ සූත්තරේ කාටවත් දෙන්න
එපාය. ඒ සූත්තරේ ලෝක වෙළඳ පොලේ තෙල් කොච්චර අඩු උනත් හැමදාම තෙල් මිල වැඩිවෙන්න
පුලුවන් විදිහේ සූත්‍රයක් වෙන්න ඕනෑය.
අනිවා ඉස්කෝලේ
ළමයින්ට ටැබ් දීපන්ය. උන්ට ඒවා නැති උනොත් ඉගෙනීමක් නැතිය. ඉස්කෝලවලට, ගුරුවරු,
ඩෙස් බංකු, ගොඩනැගිලි, වැසිකිලි, කරන්ට් එක වැනි ලබ්බවල් නැති උනාට කමක් නැතිය.
ටැබ් නම් නැතිවම බැරිය. මම එවනා මේ ෆොටෝඑක බලපන්ය. අපේ රටේ ටැබ් නැතිව දරුවන් ඉගෙන
ගන්න විඳිනා දුක උඹටත් තේරුම් යයිය.
උඹට රටට වැඩක්
කොරන්න බැරිය කියා දුක් වෙන්න ඕනෑ නැතිය. කලින් ආණ්ඩුවෙන් හදාපු දේවල් උඹ කෙරුවා
වාගේ උඹේ නම ගහලා විවෘත කොරපන්ය. වී ගබඩා කොරන්න ඉඩ නැත්නම් ගුවන්තොටුපොලේ ගබඩා
කොරපන්ය. අනිත් රටවල් එවුවන් නැව්, ප්ලේන් හදලා වික්කාට උඹ හිතේ අමාරුව ගන්නට
නාකය. උඹ උන්ට පේන්නත් එක්ක වරාය ගුවන් තොටුපල වගේ දේවල් විකුණපන්ය. එතකොට උන්
ඉරිසියාවේ පුපුරයිය.
මතක ඇතිව
රැස්වීමකට යනකොට කයියක්, කතන්දරයක්. රබන්
පදයක්, බෙර පදයක් තේරවිල්ලක් පාඩම් කරගෙනම පලයන්ය. ඒකට උත්තර දෙන්නත් එකෙක්
කලින්ම සූදානම් කොරලා රැස්වීමට යවාපන්ය. ඒ මොකද කිව්වොත් ජනාධිපති - අගමැති කයි පද,
තේරවිලි දන්නවා කියන එක රටකට ජාත්‍යන්තරෙන් මාරම නම්බු ලැබෙන වැඩක් වන නිසාය. ඒක
දැන් රටක දියුණුව මණිනා දර්ශකයක්ය.
ඉතින් ඉම්රාන්
අය්යේ උඹත් මේ උපදෙස් හරියට හිතට ගත්තොත් වරදින්නේ නැතිය. කෝකටත් උඹ ඇමරිකන්
නැත්නම් සිංගපූරු පුරවැසිභාවයත් කලින්ම අරන් තියා ගැනීම සරීර සවුක්කියට හොඳය. තව ලියන්න දේවල් තිබුණත් ගෑස් සිලින්ඩරයක්
ගන්න යන්න ඕනෑ නිසා ලිවීම නවත්තනවාය. නැත්නම් අද රෑ දොලහට ලෝක වෙලඳපොලේ ගෑස්
නැග්ගුවොත් අපෙත් ඔටෝම නගින බව දන්නා නිසාය.
මීට
මල් මලයා
